CRiC News

DATGANIAD I'R WASG

Ym mis Medi, bydd y weledigaeth o gael canolfan wybodaeth gymunedol yng Nghrughywel yn cael ei gwireddu o'r diwedd, diolch i grwp o wirfoddolwyr ymroddedig.

 Bydd Canolfan Gwybodaeth ac Adnoddau Crucywel yn cael ei hagor yn swyddogol ddydd Mawrth 12 Medi a bydd yn benllanw bron pum mlynedd o waith caled i sicrhau cyfleuster pwrpasol ar gyfer y gymuned leol. Dechreuwyd ystyried y prosiect adeiladu ym mis Hydref 2001. Ers hynny, mae wedi sicrhau cyllid gan Raglen Drosiannol Amcan 2 yr Undeb Ewropeaidd, Cyngor Sir Powys, Parc Cenedlaethol Bannau Brycheiniog, Lywodraeth Cynulliad Cymru a Phartneriaeth Twristiaeth Canolbarth Cymru. 

 Mae'r agoriad wedi'i groesawu gan Tamsin Dunwoody, y Dirwprwy Weinidog dros Fenter, Arloesi a Rhwydweithiau

 "Rwy'n siwr y bydd y prosiect ardderchog hwn yn gwneud cyfraniad mawr i fywyd y gymuned leol. Hoffwn longyfarch bawb sydd wedi helpu i sicrhau bod y cyfleuster gwerthfawr hwn wedi'i gwblhau," meddai.

 "Mae Llywodraeth y Cynulliad yn hynod falch fod y defnydd medrus o arian Ewrop yn gwneud cyfraniad mor bositif i'r economi leol ac i weithgareddau cymdeithasol."

 Y ganolfan newydd, sydd wedi'i lleoli'n gyfleus ar gefn ffordd yr A40 sy'n mynd trwy ganol Crucywel, fydd yr adeilad cymunedol mawr cyntaf i'w godi yng nghanol y dref am oddeutu canrif. Yn ystod y broses adeiladu, bu'r ganolfan yn destun llawer o sylw a diddordeb gan bobl leol ac ymwelwyr. Ar 18 Medi, bydd ar agor i'r cyhoedd am y tro cyntaf. Bydd ymwelwyr yn cael cyfle i ddefnyddio technoleg gwybodaeth a chyfathrebu, i gael gwybodaeth a chyngor twristiaeth, gwasanaethau cymorth cymunedol a gwasanaethau ysgrifenyddol. Yn y ganolfan hefyd, ceir siop goffi fach, cyfleusterau cynadledda a system o weithio wrth sawl gweithfan, ynghyd ag oriel celf a chrefft. Bydd dau sefydliad cymunedol lleol, Swyddfa Gwirfoddolwyr Crucywel a Grwp Archifau Crucywel a'r Cylch, yn rhannu'r adeilad. Yn ogystal, mae gan y dref doiledau newydd bellach hefyd.

 Mae Canolfan Gwybodaeth ac Adnoddau Crucywel yn sefydliad elusennol a chwmni cyfyngedig trwy warant gyda bwrdd reoli o gyfarwyddwyr/ymddiriedolwyr - sydd oll yn wirfoddolwyr. Mae ganddi bedwar aelod o staff rhan-amser cyflogedig a chriw o ryw 60 o wirfoddolwyr sy'n helpu i redeg y gwasanaethau niferus fydd bellach yn cael eu cynnig. Tua deuddeng mlynedd yn ôl, cychwynnodd y sefydliad mewn ystafell fechan yn yr ysgol uwchradd leol. Fel rhan o "Telecentres Powys", nod y gwirfoddolwyr cyntaf oedd rhoi cyfle i'r cyhoedd ddefnyddio cyfrifiaduron a chael hyfforddiant.

 ae'r nod cychwynnol yn parhau i fod yn rhan o ethos y Ganolfan, ond yn 2001, yn sgil yr effeithiau trychinebus a gafodd epidemig Clwy'r Traed a'r Genau ar y diwydiant ffermio a'r diwydiant ymwelwyr lleol, ehangwyd y nodau i gynnwys awydd i hybu a helpu'r economi leol i fod yn gynaliadwy. Ar hyn o bryd, mae'r gweithgareddau canlynol yn rhan o 'bortffolio'r sefydliad: cefnogi darparwyr twristiaeth a gwaith arallgyfeirio ffermydd, cyngor gyrfaoedd, mentora busnesau bach ifanc, arferion da amgylcheddol a rhedeg gwefan gymunedol.   Mae aelodau'r tîm rheoli hefyd o'r farn y gallent rhannu eu profiadau o ran dod â'r prosiect i'w derfyn gydag eraill sy'n ystyried dechrau cynlluniau tebyg. 

 Mae'r broses adeiladu bellach wedi dod i ben. Nawr rhaid dechrau ar y gwaith o sicrhau bod yr holl wasanaethau a gynigir yn y ganolfan o'r safon uchaf a'u bod yn gynaliadwy. Mae staff a gwirfoddolwyr y ganolfan yn sylweddoli y bydd yr adeilad nodedig hwn yn ganolbwynt gweithgarwch a chyngor i'r bobl leol. Maent felly'n awyddus iddo fod yn lle a fydd yn esiampl i gymunedau eraill yng Nghymru.

 I gael mwy o wybodaeth cysylltwch â : Jan Morgan, Rheolwr Prosiect ar 01873 811970 or yn admin@criccentre.plus.com